Програмчлалын олон төрлийн сайн хэлүүд байхад яагаад Python -г судлах хэрэгтэй талаар авч үзье. Python -г програмчлалын хэлүүдээс хамгийн сайн, илүү гэж үзэх нь өрөөсгөл ч орчин үеийн програмчлалын сайн хэлүүдийн нэг гэдгийг дурдах нь зүйтэй. Олон програм зохиогчид яагаад Python -г илүү сонирхдог шалтгаануудад
- Энгийн, тогтмол хийдэг ажлуудыг автоматжуулахад Python маш сайн. Жишээ нь ямар нэгэн үйлдлийн системд тогтмол хугацаагаар биелэгдэж байх жижиг скриптүүдийг бичихэд энгийн.
- Шинжлэх ухааны програм бичихэд зориулагдсан олон тооны фреймворк, сангуудтай тул Python -дээр ийм төрлийн програмыг зохиох боломжтой.
- Хэрэлэгчийн график интерфейс бүхий ердийн десктоп програмыг зохиож болно.
- Python дээр Android үйлдлийн системийн програмыг зохиох боломжтой.
- Django, Flask фреймворкуудыг ашиглан Python -р вебд суурилсан програм зохиож болдог.
- Маш өргөн дэлгэрсэн Tenser Flow санг ашиглан машины сургалтыг дэмждэг.
Нэг үгээр хэлбэл Python дээр бүх үйлдлийн системд ердийн desktop, мобил, веб гэх мэтээр бараг бүх төрлийн програмуудыг бичиж болно. Үүний дээр Python
- Энгийн, богинохон, гоё бичлэгийн дүрэмтэй. Жишээ нь Python -нд C төрлийн хэлүүдийнх шиг их хаалт буюу {} тэмдэгтүүдийн оронд догол мөр буюу indent -ийг ашигласнаар код богинохон ойлгомжтой болдог. Энэ нь C төрлийн хэлүүдийг мэддэг програм зохиогч нарт эхэндээ багахан хүндрэлийг үүсгэх ч хурдан дасна. C төрлийн хэлүүдэд бичсэн ижил төрлийн кодоос Python -ны код бараг 30 хувиар бага болдог гэсэн харьцуулалт ч бий.
- Python кросс платформийн хэл. Өөрөөр хэлбэл Python нь Wirndows, MacOs, Liunix үйлдлийн системүүдэд ажиллана гэсэн үг. Хэлний архитектурийн олонхи бүтцүүд зарим програмчлалын хэлүүдийнх шиг хэтэрхий абстракцийн хүндрэлгүйгээр зохиогдсон. Хэлний олон тооны бэлэн боловсруулагдсан сангууд асуудлын шийдэл болгонд шинээр кодлох буюу "дугуй" зохион бүтээхийг шаардлагагүй болгон өгсөн.
- Python нь нээлттэй кодтой хэл бөгөөд түүн дээр бичигдсэн асар олон тооны үнэгүй сангууд байдагийг ашиглан нилээд төвөгтэй програмыг хурдан боловсруулах боломжтой.
- Сурахад энгийн хэл. Python дээр бодит ажлын даалгавартай програмыг зохиохын тулд олон хуудас ном, сурах бичгийг судлаад байх шаардлагагүй. Шууд суралцахын зэрэгцээ програмчлалаад явах боломжтой.
- Том компаниуд Python -г ихээр хэрэглэдэг. Энэ нь хэл програмчлалын ертөнцөд өөрийн гэсэн байр сууриа эзэлсэнг гэрчлэхийн дээр та Python дээр програмчилдаг бол томооохон компанид ажилд орох боломжийг өндөрсгөнө гэсэн үг.
Python -г техникийн талаас харвал
Энд өгөгдөх мэдээлэлүүд програмчлалыг шинээр сурч буй хүмүүст ойлгомжгүй мэт санагдаж болох ч C, Java гэх мэт хэлүүдийг мэддэг бол Python -г техникийн талаас ойлгоход дөхөмтэй. Python -г програмчлалын хэл буюу техникийн талаас харвал:
- Python бол ерөнхий зориулалтын хэл. Өөрөөр хэлбэл хэл ямар нэгэн тусгай зориулалтын бус түүгээр хэрэглэгч өөрт хэрэгтэй ямарч ажлыг програмчилж болно. Энэ тухай өмнө нь дурдсан.
- Python хатуу төрөлжилттэй хэл. Үүнийг янз бүрээр л тайлбарладаг. Та C, Java гэх мэт хэлүүдийг мэддэг бол хатуу төрөлжилт гэдгийг мэдэх байх. Энгийнээр хэлбэл програмчлалын хэлүүд өгөгдлийн төрлүүдэд хийх ажиллагааны гүйцэтгэл зарим нэгэн хязгаарлалтуудыг тавьдаг. Хатуу төрөлжилттэй хэлүүд өгөгдлүүд дээр ажиллагаа хийх бүрдээ өгөгдлийн төрлүүдтэй холбоотой алдаа байгаа эсэхийг тодорхойлохын тулд төрлийн шалгалтыг хийдэг. Хэрвээ өгөгдлийн төрлүүд хийгдэх ажиллагаанд тохирохгүй байвал онцгой нөхцөл /Exception/ буюу алдааг дууддаг. Жишээ нь Python нэмэх үйлдэлд тохирохгүй төрлүүдийг ашиглахад хязгаарлалт тавьдаг. Өөрөөр хэлбэл тоо болон мөр төрлүүдтэй өгөгдлүүдэд нэмэх үйлдлийг хийхийг хориглодог гэсэн үг. Гэтэл сул төрөлжилттэй Javascript маягийн хэлүүд үүнийг зөвшөөрдөг. Үүнийг хатуу төрөлжилттэй хэл гэж ойлгоорой.
- Python динмак төрөлжилттэй хэл. Үүнийг хувьсагчийн төрлийг түүнд утга олгох үед тодорхойлох гэж ойлгоход болно. C, Java гэх мэт хатуу төрөлжилттэй хэлүүдэд хувьсагчийг зарлахдаа төрлийг заан өгдөгөөс өөр шүү. Иймээс динамик төрөлжилттэй хэлний кодын тодорхой хэсгүүдэд нэг хувьсагч өөр төрлийн утгуудыг авах боломжтой гэсэн үг. Динмак төрөлжилттэй хэлүүдэд олон удаа тодорхой давтамжтайгаар ажиллах энгийн жижиг скриптийн боловсруулалт амархан хийгддэг бол энд ч өөрийн гэсэн дутагдал бий. Жишээ нь хатуу төрөлжилттэй хэлүүдэд кодын компиляци хийх үед тохирохгүй төрлийн ашиглалттай холбоотой энгийн алдаануудыг илрүүлж болдог бол динамик төрөлжилттэй хэлүүдэд програмын ажиллагааны үед төрлийн ашиглалттай холбоотой алдаанууд ил болдог.
- Python хөрвүүлэгддэг хэл. Үүнийг тухайн хэл дээрх эх кодыг интерпретатор буюу хөрвүүлэгч ажиллах үед нь машиний код болгодог гэж ойлгоно. Гэхдээ Python -ны интерпретатор эхний удаад эх кодыг байт код руу хөрвүүлээд дараа нь эх кодод өөрчлөлт ороогүй бол байт кодоор програм ажилладаг онцлогтой. Java, C# хэлүүд ч эх кодыг өөрийн гэсэн байт код руу хөрвүүлэн ажилладаг.
- Python мултипарадигм хэл. Парадигма гэдгийг (грекээр παράδειγμα, «шаблон, жишээ, хэв») програмчлах хэв загвар, аргачлал гэж ойлгож болно. Мултипарадигм гэдгээс Python програмчлалын обьект хандлагат, функционал гэх мэтийн олон аргачлалыг дэмжинэ гэсэн үг. Орчин үеийн бүхий л хэлүүд мултипарадигм боломжийг нэвтрүүлэх болсон. Бодит нөхцөлд тохиолдох асуудлууд олон аргачлалуудын аль нэгээр илүү амархан, хурдан, оновчтой шийдэгдэх боломжтой учраас програмчлалын хэл мултипарадигмийг дэмжих нь түүний давуу талыг л өсгөнө гэсэн үг.
- Хөрвүүлэгчийн олон хэрэгжүүлэлттэй. Өөрөөр хэлбэл хэл олон интерпретатор буюу хөрвүүлэгчтэй гэсэн үг. Стандарт хөрвүүлэгч нь CPython ба үүний зэрэгцээ Java (JVM) виртуал машиний - Jython, .NET -ийн - IronPython, PyPy гэх мэтийн хувилбарууд бий. CPython бол бусад хувилбаруудаас тархалт, боломжуудаараа хол тасархай маш хүчэрхэг хэрэгжүүлэлт. Интернетээс Python -ий албан ёсны сайтаас татан аваад суулгахад л таны компьютерт CPython -г тавина. CPython -г ашиглаад сурсан байхад бусад хэрэгжүүлэлтэд шилжихэд онцын хүндрэл үүсэхгүй.
Хичээлүүдэд хэлний техникийн асуудалд гүнзгий ороод байхгүй. Дээрх мэдээллүүд програмчлалын зохих мэдлэгтэй хүмүүст ойлгомжтой байж мэдэх тул шинээр сурч байгаа хүмүүс үүнийг одоохондоо өнгөрөөж ч болно. Цаашид програмчлалын зохих мэдлэгтэй болох үед эдгээрийг эргэн судлан үзээрэй.
