Эхлэн суралцагчдад Python -ий ямар хувилбараас эхлэх асуудал үүсдэг. Python 2 -ийг 2020 оноос эхлэн хөгжүүлэлтийг зогсоосон тул Python 3 -ийг суралцах сууриар авах нь зөв. Python хэлний нэг онцлог шинэ хувилбар өмнөх хувилбараа дэмждэггүйд оршино. Хувилбаруудын суурь маш төстэй ч Python 3 -т Python 2 -ийн зарим нэгэн асуудлыг шийдвэрлэсэн тул энэ хэсэгт хувилбарууд тохирохгүй. 2020 оноос Python 2 -ийн хөгжүүлэлт зогсож байгаа хэдий ч хувилбар бүрмөсөн байхгүй болохгүй нь ойлгомжтой. Хувилбаруудын суурь маш төстэй тул та Python 3 -ийг сурснаар Python 2 -ийн кодийг төвөггүй ойлгоно. Python 3 -ын бас нэгэн давуу нь хувилбар анхдагчаар Unicode -ийг дэмждэг болсон нь тэмдэгтийн кодчлолд гардаг олон хүндрэлүүдийг шийдсэн.
Python 2 -ийн ихэнх сангуудыг Python 3 -т хөрвүүлсэн тул сангуудаар олон тооны асуудлыг ханган шийдэх боломжтой болсон. Иймээс хичээлүүдэд Python 3 хувилбарыг судлана.
Python -ий стандарт сангууд
Програм бичихэд нэмэлт сангууд суулгахгүйгээр Python -ий асар тооны стандартууд сангуудаар олон асуудлыг шийдвэрлэх бүрэн боломжтой. Стандарт сангуудаар мөр, тоо, өгөгдлийн бүтцүүд, огноо, цаг хугацаа, файлууд, урсгал, багцууд гэх мэтээр олон тооны өгөгдлүүдтэй ажиллана. Стандарт сангууд өгөгдлийн олон төрлүүдийг өгөх тул та програм зохиохдоо тэдгээрийг програмыг бүтээх үндсэн блокууд байдлаар ашиглах юм. Python -ий албан ёсны сайтад хандан Documentation хэсгээс
хэлний хувилбаруудын стандарт сангууд, хичээлүүд, номнууд, суулгах аргачлал, хэлний боломжууд гээд бүхий л материалуудыг үзэж болно. Сайт нилээд хэдэн хэл дээр боловч тэнд Монгол хэл байхгүй.
Ямар нэгэн зүйлийг судлах тэр дотроо програмчлалын хэлийг судлахад англи хэлний мэдлэг нэн чухал. Англи хэлийг бүрэн мэдэхгүй ч техникийн англи хэлний зохих мэдлэгтэй байхгүй бол програмчлалын асуудлыг бүрэн ойлгоход маш хүндрэлтэй. Зөвхөн хичээлийн хүрээнд өгөгдөж буй материалаар хэлийг сурна гэдэг их өрөөсгөл. Хичээлд ерөнхий зүйлийг л заахаас тохиолдол бүрийг бүгдийг оруулан ирнэ гэвэл цаг хугацаа, хөдөлмөр ихээр шаардана. Техникийн англи хэлний хүрээ бага тул тэдгээрийг цээжлэн тогтооход хүндрэлгүй. Хичээлээр мэдсэн зүйлээ интернет, ном сурах бичгээс гүнзгийрүүлэн судлахад та англи хэлийг тойрохгүйг санаарай.
