Шатрын дүрмийн мэдлэгээс үүдэн өрсөлдөгчдийн хооронд маргаан гарах нь элбэг байдаг. Энэ хичээлд бид тоглолтыг дэг журамтай байлгахад шатарчин бүр баримталж байх ёстой үндсэн дүрмүүдийг авч үзнэ.

Хүрсэн бол нүү

Нүүх ээлж нь болсон шатарчин (санаатай эсвэл санамсаргүй аль нь ч бай) өөрийн шатарт хүрсэн л бол түүгээр нүүх ёстой. Хэрвээ шатарчин эсрэг талынхаа шатарт хүрсэн бол түүнд ашиггүй байсан ч хүрсэн шатраа идэх ёстой. Шатарчны хүрсэн өөрийн шатар нь боломжит нэг ч нүүдэлгүй, мөн түүнчлэн түүний хүрсэн эсрэг талын шатарыг идэх ямарч бололцоогүй бол ямар нэгэн үр дагаваргүй өөрийн хүссэн нүүдлээ хийдэг. Өөрөөр хэлбэл ямар нэгэн торгууль байх ёсгүй. Шатарчин өөрийн болон хүний шатарт нэгэн зэрэг хүрсэн бол эсрэг талын шатрыг өөрийн шатраар идэх ёстой. Эхлээд өөрийн шатарт хүрээд дараа нь тухайн шатраар идэх боломжгүй эсрэг талын шатарт хүрсэн бол хүрсэн өөрийн шатраар дурын нүүдлээ хийнэ.
Шатруудынхаа эвгүй өрөгдсөн байрлалыг цэгцлэх хэрэгтэй бол зөвхөн өөрийн нүүдэл хийх ээлжинд өрсөлдөгчдөө цэгцлэх тухайгаа мэдэгдээд дараа нь шатартаа хүрнэ. Мэдэгдээгүй бол хүрсэн бол нүү дүрэм үйлчлэх болно.

Гар салсан бол нүүдэл хийгдсэн

Шатарчин өөрийн шатрыг бариад нэг нүднээс нөгөө нүдэнд шилжүүлээд шатраас гараа салгасан бол түүнийг нүүдэл хийгдсэн гэж үзнэ. Хүү эсрэг талын байрлалын эхний шугам хүрээд түүний оронд тухайн хүүний өнгийн ямар нэгэн бодыг тавиад гараа салгасан бол нүүдлийг дууссанд тооно. Сэлгээ хийхдээ ноён шалаатай нүдийг дамжсан эсвэл шалаатай нүдэнд буусан бол ноён тэргийг өөрсдийнх нь анхны байрлалд буцаагаад ноёнгоор нүүх юмуу нөгөө тал руу сэлгээ хийлгэнэ. Нэгэнт нүүсэн нүүдлээс буцахыг хориглоно. Шатраас гар салаагүй бол тухайн шатраар өөр нүдэнд нүүдэл хийж болно. Шатраа бариад хөлөг дээр гараа удаан барих нь зохисгүй. Үүний оронд шатраа эхний байрлалд буцаагаад нүүдлээ сайн бодож байгаад нүүх хэрэгтэй.
"Хүрсэн бол нүү" , "Гар салсан бол нүүдэл хийгдсэн" эдгээр дүрмүүдийг найз нөхөдтэйгөө тоглох өрөгөнд ч баримтлахыг хичээгээрэй. Энэ нь нүүдэл хийхдээ анхааралтай байх санаандгүй яаран шатарт хүрснээс болон харамсалтай хожигдолд хүрэхээс хамгаалах болно.

Нэг нэгэндээ хүндэтгэл бай

Тоглолт хэрхэн өрнөх яаж дууссанаас үл хамааран өрсөлдөгчид бие биедээ боловсон хандах хэрэгтэй. Өргийг эхлэхдээ өрсөлдөгч нар гараа барилцаад өрөг яаж төгссөнөөс үл хамааран бас гар барилтаар дуусна. Тоглолтын үед эмх цэгцтэй чимээгүй байдлыг сахих ёстой. Нүүдлээ бодож байхдаа шатрын хөлөгт хүрэх, өрсөлдөгчийн нүүдлийн талаар ярилцах зэргийг хийж болохгүй.
Өрөгт хожигдоод "санаадгүй хожигдчихлоо" эсвэл "хожих байлаа" гэх зэргээр ярих нь онцгүй. Харин түүний оронд өрсөлдөгчдөө баяр хүргээд өргөө хамтран дүгнэн үзэх нь илүү ашигтай.