Өнөөдөр бараг айл бүхэн гэртээ компьютертай болсон гэхэд хилсдэхгүй. Гэхдээ таны хүүхдүүдээ авч өгсөн компьютер тэдэнд хир зэрэг тус хүргэж байгааг нэг анзаараад үзээрэй. Хүүхдүүд зав л гарвал компьютер дээр суугаад (заримдаа бүр үргэлж байх нь ч бий шүү) интернетээр хэсээд байгааг бид хараад манай хүүхэд компьютерт их сайн болоод байгаа мэтээр ойлгож ердөө болохгүй шүү. Зарим хүмүүс энэ үзэгдлийг бүр магтаал байдалтай ярьж байдаг нь бүр ч гайхалтай. Яг юу хийж байгааг мэдэхгүйгээр юмыг үнэлэх тэр тусмаа магтах нь хортой. Өнөөдөр технологийн хөгжил дэвшил нь хүмүүст бүхий л мэдээллийг олж авах ашиглах боломжийг нээн өгсөн хэдий ч аливаа юм хоёр талтай байдгийн жишээгээр сөрөг үр дагаварууд нь дагаад өссөөр байна.

Тэгэхлээр бид хүүхдүүдээ яах гэж компьютер авч өгсөн бэ? гэдгээ нэг эргэн санах хэрэгтэй байх. Тоглуулах, интернетээр хэсүүлэх, элдэв төрлийн кино, бичлэг үзүүлэх, дуу хөгжим сонсуулах элдэв төрлийн үг хэллэгээр чат хийлгэх ... гэж компьютер аваагүй байх л даа. Хүүхдүүд компьютераа ашиглан их зүйлийг сурч мэдэж байгааг би энд үгүйсгэх гээгүй юм шүү. Гэхдээ миний ажиглаж байгаагаар ихэнх компьютер хэрэглэгчид маань түүнийг ихэнхдээ дээр дурьдсан аргаар ашигладаг нь тодорхой.

Бид өнөөдөр хүүхдүүдээ хичээл номондоо сайн байхыг л шаардахаас тэднийг яаж сайн сургах аргаа нэг л олохгүй байгаа юм шиг. Хүүхдээр ямар нэгэн юмыг өөрөөр нь оролдуулж бие даан суралцах чадвартай болгох нь хамгийн үр дүнтэй аргын нэг. Жишээ нь хүүхдүүд компьютерын тоглоомыг хэнээр ч шахаж шаардуулахгүйгээр өөрсдөө бие даан суралцаад байгаа биз дээ. Хэдийгээр энэ нь компьютерыг ашиглах анхан шатны маш сайн дадлага боловч харамсалтай нь хэтэрвэл нилээд хортой үр дагаварыг авчирч болохыг бид мэдрээд байгаа.
Мэдээж багшаар мэдлэгийн суурийг заалгах нь тодорхой ч хүн өөрийн хичээл зүтгэлээр бусдыг нь мэдэж сурдаг. Жишээ нь. Шинжлэх ухааны суут эрдэмтэд, хөгжмийн зохиолч, зохион бүтээгчид нээсэн зохиосон зүйлээ хүнээр хэлүүлээгүй биз дээ. Эдгээр хүмүүсийн нууц нь бие даан судлах, суралцах л гэж би ойлгодог. Мэдээж нэг хувь нь байгалаас заяасан авьяас.

Хүн болгон алдартай эрдэмтэн, зохион бүтээгч болдоггүй ч гэсэн хүн мэдлэгээс илүү чадвартай байхыг ирээдүй биднээс шаардаж байна. Одоо эцэг эх, нутаг ус, хамаатан садан, найз нөхдийн дэмжлэгээр амьдардаг үе удахгүй дуусна. Тэр үед хүнийг зөвхөн юу чаддаг гэдгээр үнэлэх тул та хүүхдүүдээ бэлтгэх хэрэгтэй. Энэ бол таны бас үүрэг. Та би болоод л ирсэн юм, би юугаар яаж туслах юм гэж бодож болохгүй шүү. Та хүүхдээ бие даан суралцах чадвартай болгоход л туслах хэрэгтэй. Хэрвээ хүүхдүүдээ компьютер авч өгсөн бол та эхний алхамаа хийсэн гэсэн үг. Одоо үзэж судлах зүйлийг нь авч өгөх хэрэгтэй. Компьютер байхад л бүгдийг сурч болно гээд ярьсаар байгаад түүндээ итгэчихсэн нь их муу. Үзэж харах зүйл нь дандаа гадаад хэл дээр эсвэл хүнд хэрэг болохоосоо илүү хэрэггүй зүйлүүд голдуу байвал таны хийсэн алхам хүүхдээ хорлохтой агаар нэг бус уу. Иймд хүүхдүүдээ компьютер авч өгсөн эхний том алхамаа үр дүнтэй болгох тал дээр та нэгийг бодоод үзээрэй.