Та манай сайтын Программчлал буланд Javascript, PHP, HTML, CSS , SQL хэлүүдийн хичээлийг яагаад тавьсанд гайхаж байж магадгүй. Java, Perl, C, Visual хэлүүд гээд программчлалын олон хэлүүд байдаг даа. Учир нь энэ хэсэг бол веб сайт хийхийг сонирхож байгаа, веб программ зохиогч болох гэсэн хүмүүст зориулсан хэсэг юм. Веб сайт хийхийн тулд та Javascript, PHP, HTML, CSS , SQL хэлүүдийг үзэх хэрэгтэй. Аймаар санагдав уу. Үнэндээ бол тийм ч аймшигтай биш шүү. Та үүнд итгээрэй. Манай сайтад байгаа хичээлүүдийг үзсний дараа та өөрийн веб сайтыг хийх үндсэн мэдлэгтэй болно. Эдгээр хэлүүдийг бүгдийг багц байдлаар судалж байж веб сайт хийж сурдаг тул манай сайтын энэ булан бүтнээрээ нэг курс болох юм.

PHP - таны веб сайтын үндэс. Хэл веб сервер дээр суугдана. Веб сайтаа боловсруулахдаа та заавал PHP -г сонгох албагүй. Нэг ижил асуудлыг PHP -тэй адилхан хэмжээнд шийдэх боломжтой олон тооны өөр бусад хэлүүд байдаг тул танд сонголт байгаа ч HTML, CSS , Javascript -ын талаар заавал мэдэж байх ёстой. Дээр нь веб программ зохиогчдын бараг 99 хувь өгөгдлийн сантай ажиллахын тулд SQL хэлийг судалдаг. Гэхдээ та веб программчлалыг дөнгөж судалж эхэлж байгаа бол PHP таны анхны сервер талын программчлалын хэл байх хэрэгтэй. Учрыг тайлбарлая.

• PHP -г олон тооны жижиг болон том хэмжээний сайтад ашигладаг. Жишээ нь Facebook -ийн ихэнх хэсэг, Wikipedia сайтын агуулгын удирдлагын систем PHP дээр бичигдсэн
• Дэлхийд том орох Wordpress, Joomla, Drupal гэх мэтийн ихэнх АУС (агуулгын удирдах систем) -үүд PHP дээр бичигдсэн.
• PHP программистуудын нийгэмлэг асар том бөгөөд шинээр эхлэгчдэд туслахад хэзээд бэлэн.
• PHP бүрэн хэмжээнд боловсруулагдан хурдан ажилладаг хэл. Өөрөөр хэлбэл хөгжлийн эрт өмнөх үеүүдийн алдаанууд бүрэн засагдсан гэсэн үг.
• Бусад төрлийн серверийн хэлүүдтэй харьцуулахад PHP -гийн талаарх асуудлыг интернетээс олоход хамаагүй амар, ихээр байдаг.
• Ердийн веб сайт боловсруулахад Perl, Java гэх мэтийн суралцахад хүндрэлтэй хэлүүдийг үзэх шаардлага байхгүй.
• PHP -г сурахад амархан, ойлгомжтой. Бичлэгийн дүрэм нь орчин үеийн өргөн дэлгэрсэн хэлүүдтэй ижилхэн.

Хүмүүс .NET, Cobol, D, Erlang, Fortran, Go, Haskell, Lisp, OCaml, Python, Smalltalk гээд олон тооны хэлүүдийг ярьдаг ч үнэн хэрэгтээ зүгээр л онгирох гэж байгаа хэлбэр. Мэдээж эдгээр хэлүүдэд зарим нэгэн давуу талууд байдаг ч та эхлэн суралцагч бол эдгээр хэлүүд таных биш шүү. Дээр нь зарим нэгэн хэлүүд үнэтэй байдаг. Хэрэг дээрээ PHP, Javascript -ын хослол дээрх хэлүүдийн боломжийн бараг 99 хувийг танд өгч чадна.
Үүнээс гадна та нэг нэгнийхээ нэмэлт болж байдаг нягт уялдаа бүхий HTML, CSS хэлийг судлах хэрэгтэй. HTML хэл веб хуудсыг таны хөтөч дээр үзүүлэхэд түүний бүтэц, агуулгыг хариуцна. Жишээ нь ямар дүрс, товч, баннер хаана байрлах, формын ямар талбар имайл, ямар нь хэрэглэгчийн нэрийнх гэх мэтээр Харин CSS хэл хөтөчид үзүүлж байгаа хуудасны гадаад төрхийг хариуцна. Жишээ нь хуудасны агуулгын фонт, өнгө, хэмжээ ямар байх, хэсгүүд хоорондоо хэрхэн байрлах, зургийн хүрээний өргөн, догол мөрийн хэмжээ гэх мэтээр. Энэ хоёр хэлээр та хуудасны ерөнхий бүтэц, харагдах хэлбэрийг бүхэлд нь зохицуулах тул гарцаагүй сурсан байх хэрэгтэй.
Өнөөдөр өгөгдлийг хадгалах өөр хэлбэл өгөгдлийн баазтай харьцдаггүй сайт гэж бараг байхгүй болсон. Иймд та өгөгдлийн санг удирдах SQL хэлийг судлах хэрэгтэй. Хэл нь өгөгдлийн сангаас мэдээлэл татан авах, өгөгдлийг нэмэх, өөрчлөх, устгах гээд өгөгдлийг удирдах бүхий л ажиллагааг хийх гол хэрэгсэл болно.
Динамик сайтын ажиллагааны зарчим бол HTML, CSS хэлээр бэлтгэсэн хэвд өгөгдлийн санд хадгалсан агуулгыг SQL хэлээр татан аваад PHP хэлийг ашиглан хуудсны агуулгыг хэвэнд оруулаад хөтөчид илгээнэ. Хуудастай хэрэглэгчийн талд ажиллах ажиллагааг Javascript хэл хариуцан ажилладаг. Эндээс дүгнэвэл  

• Javascript (таны сайтыг үзэж байгаа хэрэглэгчийн хөтөч программд суугдсан программчлалын хэл)
• PHP (таны сайт байрлаж байгаа серверт суугдсан программчлалын хэл)
• HTML (хөтөч дээр хуудасны бүтцийг үзүүлэх хэл. Хөтөч хэлний бичлэгийг ойлгон хөрвүүлж хуудсыг дэлгэц дээр үзүүлнэ.)
• CSS (хуудасны гадаад хэв маягийг тодорхойлох хэл. Хөтөч хэлний бичлэгийг ойлгон хөрвүүлнэ.)
• SQL (таны серверт хадгалагдаж байгаа өгөгдлийн сантай холбоо тогтоох хэл)

болно. Эдгээр хэлүүдээс PHP, SQL хоёр сервер талд хэрэглэгчийн хуудсыг бэлтгэх ажиллагааг хариуцан бусад 3 нь хэрэглэгч талын хөтөч программд суугдан ажилладаг. Гэхдээ хэрэглэгч талд суугдсан программууд таны серверээс дамжуулсан хуудсыг үзүүлэх түүнтэй ажиллах ажиллагааг хийнэ гэдгийг ойлгох хэрэгтэй. Таны хуудасны хэв, хэвийг хэлбэржүүлэх файл, javascript кодууд, php кодууд гээд сайттай холбоотой бүхий л файлууд сервер талдаа хадгалагдаж байдаг. Хэрэглэгчийн шаардлагын дагуу эдгээр файлуудаас динамик байдлаар бүрдүүлэлт хийгээд үзүүлэх хуудсаа л хэрэглэгчид дамжуулдаг. Энэ талаарх нарийн зүйлсийг хичээлүүдийг үзэх үедээ судлаарай.

Сайт хийж сурах бол амархан. Одоо шууд судлаад эхлээрэй.