Adobe Photoshop CS бол график дүрсүүдийг засварлах мэрэгжлийн засварлагч. Веб хуудасны дизайн, хэвлэлийн эхэд зориулагдсан растер график дүрсүүдийг үүсгэх, засварлахад зориулагдсан программ юм. Өнөөдөр растер график файлуудыг боловсруулахад хамгийн өргөн ашиглагддаг хэрэгслүүдийн тоонд Photoshop зүй ёсоор ордог. Программын 13.0 буюу CS6 хувилбарт растер графиктай ажиллахаас гадна вектор графикийг оруулан ирэх, хөдөлгөөнт файлууд үүсгэх, видео хэсгүүдийг засварлах, гурван хэмжээст дүрсийг үүсгэх нэмэлт боломжууд бий болсон. Үүнээс гадна тоон фотог боловсруулах олон төрлийн шинэ функцууд нэмэгдсэн.
Хичээлүүдэд ашиглах зарим хэллэгийг эхлээд ойлгох хэрэгтэй.
Эдгээр хэллэг нь хулганаар хийх үйлдлүүдийг хураангуйлсан болно. Windows -ийн программуудыг ашиглах гол хэрэгсэл хулгана байдаг болохоор эдгээр хэллэгийг сайн тогтоогоод аваарай.
- Зүүн даралт – Хулганы зүүн товчийг нэг дарах
- Хоёр даралт – Хулганы зүүн товчийг ойрхон хоёр дарах
- Баруун даралт – Хулганы баруун товчийг нэг дарах
- Чирэх – Хулганы зүүн товчийг дарсан чигээрээ заагчийг шилжүүлэх
- Байрлуулах – Хулганы заагчийг элемент дээр аваачих. Хулганы товчийг дарахгүйгээр.
- Сонгох - Хулганы заагчийг элемент дээр аваачаад зүүн товчийг дарах
Үүнээс гадна программын цэстэй ажиллахад хийгдэх тэмдэглэгээг тохирох хэрэгтэй.
Цэсний командын заалт дараах байдлаар өгөгдөнө. Жишээ нь Image -> Adjustments -> Levels гэдэг нь үндсэн цэсээс Image цэсийг сонгоно. Цааш нээгдсэн цэсүүдээс Adjustments цэсээр ороод Levels командыг өгөхийг зааж байгаа болно. Зарим цэс дээр хулганы заагчийг аваачихад задаргаат цэс өөрөө нээгддэг. Түүнчлэн тухайн командын хурдан дуудах товчны хослолыг (Ctrl + L) гэсэн тэмдэглэгээгээр заана.
Программыг ажиллуулах
Adobe Photoshop программын хэвийн ажиллагааг хангахын тулд таны компьютер хамгийн багадаа доорх шаардлагыг хангаж байх хэрэгтэй.
- Процессор. Pentium 4 болон түүнээс дээш Intel Centrino, Intel Xeon , Dual-Core Intel Xeon эсвэл 1,8 ГГц дээш процессортой байх
- Үйлдлийн систем. Windows XP SP3 дээш эсвэл Windows Vista, Windows 7 гоос дээш
- Багтаамж. 512 Мбайт (1 Гбайт байхыг зөвлөдөг) шуурхай санах ой, 32 Мбайт (64 Мбайт илүү сайн) дэлгэцийн санах ой, 1,5 Гбайтаас багагүй дискний сул зай (суулгахад).
- Дэлгэц. 16 битийн видео карттай 1024 х 768 цэгийн нягтралтай (1280 х 800 байхыг зөвөлдөг)
Хурдасгах GPU зарим функцуудын хувьд Shader Model 3.0, OpenGL 2.0 графикийг дэмждэг байх хэрэгтэй. Мултимедиа функцэд QuickTime 7.2 хэрэгтэй болохоос гадна DVD-ROM заавал хэрэгтэй болно. Онлайн тусламж хэрэгтэй бол интернет гарц зайлшгүй.
Манайд худалдаанд байгаа бараг бүх компьютерууд дээрх шаардлагыг бүрэн хангахаар болсон тул асуудал үүсэхгүй нь ойлгомжтой. Ингэхэд Adobe Photoshop программ үнэтэй байдаг гэдгийг сануулъя. Та нилээд томхон зорилгод ашиглах гэж байгаа бол программыг худалдан авах нь дээр. Харин суралцахад үнэгүй болгосон хувилбаруудыг ашиглахад болно.
Программ зөв суугдсан бол Desktop дээр программын тэмдэг харин программын жагсаалт дотор тохирох цэс бий болсон байх ёстой. Тэмдэг эсвэл тохирох цэсэн дээр зүүн даралт хийхэд программ ачааллагдаж эхэлнэ.
