Lasso Tool хэрэгслүүдийг хэсгийг сонгох хэрэгслүүдэд хамааруулж болно. Хэрэгсэл нь гараар зурагдах сонголтын нарийн хэсгийг үүсгэх Lasso төрлийн хэрэгслүүдийг нэгтгэдэг. Энэ төрөл Lasso Tool (Чөлөөт лассо), Polygonal Lasso Tool (Олон өнцөгт лассо), Magnetic Lasso Tool (Соронзон лассо) гэсэн гурван хэрэгслийг агуулж байдаг.  

Lasso Tool хэрэгслүүдийн тохиргооны самбар Marquee Tool хэрэгслийнхтэй ижил.

- Lasso Tool (L) - зургаас чөлөөт хэлбэрийн хэсгийг сонгоно. Хэрэгслээ сонгоод сонголт эхлэх цэг дээр зүүн даралт хийгээд хулганы зүүн товчоо дарсан чигтээ зургийн хэрэгтэй хэсгийнхээ хүрээгээр чирэлт хийнэ. Засварлагч зурагдаж байгаа шугамд залруулга оруулснаар шугам жигд болдог. Хэрвээ чирэлтээ зогсоовол өөрөөр хэлбэл хулганы зүүн товчоо дарахаа больчихвол программ эхний болон эцсийн цэгийг хамгийн бага замаар /шулуун шугамаар/ автоматаар холбон өгнө. Энэ хэсгийн бусад хэрэгслүүд ч бас ингэж ажиллана. Shift, Alt товчнуудын функцууд Marquee Tool хэрэгслийнхтэй ижил.  

- Polygonal Lasso Tool (L) -олон өнцөгт хэсгийг сонгоно. Сонголт хийх эхний цэг дээрээ зүүн даралт хийхэд хулганы заагчийн дэргэд жижигхэн дугуй гарч ирнэ. Үүний дараа заагчаа зураг дээгүүр шилжүүлэхэд /энэ үедээ хулганы зүүн товчийг дарахгүй/ түүний араас шулуун шугам дагалдан явах болно. Шугам нь хулганы зүүн товч дээр дарах дараагийн даралт дээр дуусаад дахин шинэ хэрчимийг үүсгэх байдлаар үргэлжилнэ. Хоёр даралт хийвэл сонголтын шугамыг хамгийн бага замаар /шулуун шугамаар/ автоматаар холбон сонголтыг дуусгана.

- Magnetic Lasso Tool (L) - сонголтын хүрээг нүүр талын зургийн дүрсний хилтэй холбож өгдөг. Сонголтын эхний цэгийг зүүн даралтаар эхлүүлнэ. Сонголтын шугам хулганы заагчийг даган явж нүүр талын зургийн дүрсний хилтэй автоматаар холбогдож явахдаа сонголтын шугам дээр тохируулах зангилаа жижигхэн квадрат үүсгэдэг. Эдгээр зангилааны тусламжтайгаар сонголтыг тохируулж болно. Ийм зангилаа хичнээн их байна сонголт төчнөөн нарийн гарна.

Зөвөлгөө.

Соронзон лассо хэрэгсэл нүүр талын зургийн дүрсний хилийг дандаа зөв таниад байдаггүй. Иймээс хэрэгсэл нь хангалттай өнгөний ялгаралтай зургаас хэсэг сонгоход илүү ашигтай байдаг.  

Lasso Tool, Marquee Tool сонголтын хэрэгслийг ашигласны дараа сонголтын хилийг хэлбэрийг алдагдуулахгүйгээр шилжүүлж болдог. Үүний тулд сонгосон хэрэгслээ солихгүйгээр сонгосон хэсгийн дотор орших дурын цэгээс чирэлт хийнэ. Сонгосон хэсэг дотор хулганы заагч орж ирэхэд заагчийн хэлбэр зүүн дээд буландаа тунгалаг гурвалжин бүхий тасархай зураасан хүрээ бүхий тэгш өнцөгт хэлбэртэй болно. Энэ нь сонгосон хэсгийг зөөж болохыг илэрхийлнэ. Чирэлт хийж байхад заагч хар өнгөтэй болдог.