Валютын зах зээл 5 хоногийн турш тасралтгүй ажиллаж байдаг хэдий ч валютын хосууд янз бүрийн цаг хугацаанд янз бүрээр хэлбэлзэж байдаг. Иймээс худалдаачид Форекст ажиллах цаг хугацаагаа байнга тооцон арилжаанд оролцдог. Өөрөөр хэлбэл Форексын үеүүдийг тооцно гэсэн үг. Энэ нь арилжааны хэмжээ, чухал мэдээнүүд гарах хугацаанууд, томоохон тоглогчид оролцож эхлэх үе гэх мэтүүдээс хамаардаг. Иймээс туршлагатай трейдерүүд өдрийн турш дэлгэц хараад суулгүй Форексын арилжааны үеүүдийн цагийн хуваарийг тооцон зах зээлд дээр ажиллах цагаа зорилготойгоор сонгон авдаг.

Арилжаанд хурдан ороод гараад байдаг скальперууд чухал мэдээний гаралт дээр арилжаа хийхгүй нь мэдээж. Харин удаан хугацаагаар арилжаа хийгчид 10-20 пунктын хэлбэлзэлтэй флейтийн үед хийх юмгүй нь ойлгомжтой. Форекс арилжааны хэдэн үе байдаг.

• Азийн үе. (Улаанбаатарын цагаар 5.00-14.00)
• Европийн үе. (Улаанбаатарын цагаар 14.00-21.00)
• Америкийн үе. (Улаанбаатарын цагаар 21.00-5.00)

Форексын арилжааны үеүүдийн цагийн хуваарь нэг иймэрхүү. Одоо үе болгоны талаар арай дэлгэрэнгүй авч үзье.

Форекс арилжааны Азийн үе.

Форексын Азийн үеийн гол тоглогчид бол мэдээжээр Япон, Хятад, Австрал. Ази, далайн орнуудын чухал мэдээнүүд гарах 8.00 эсхүл 8.30 үеийг эс тооцовол Европ болон америкчууд амарч байдаг болохоор валютын ханшийн хэлбэлзэл багахан хэмжээтэй байна. Иймээс энэ үед арилжаанд оролцохоо түр азнах хэрэгтэй. Хэрвээ та өглөө эртнээс арилжаа хийхийг нэгэнт хүсэж байвал японы иентэй холбоотой хосуудаар арилжаанд оролцсон нь дээр. Улаанбаатарын цагаар 11.00 - 14.00 цагийн хооронд Азийнхан арилжаагаа дуусган амрахаар явсан харин Европчууд босон ажилдаа цуглаж эхлэж байдаг тул валютын бүх хосууд маш тайван болдог.  

Форекс арилжааны Европийн үе.

Улаанбаатарын цагаар 14.00-17.30 хооронд валютын зах идэвхижиж эхэлдэг. Энэ үед Европод ажлын цаг үргэлжлэн арилжаанд худалдаачид идэвхитэй оролцож байдаг. Яг энэ үед валютын хосуудын идэвхи, хэлбэлзэлийг дараагийн өдрүүдэд тодорхойлох хөдөлгөөнүүд бий болох нь олонтаа тохиолдоно. EUR/USD, EUR/JPY ажилладаг худалдаачдад нэн хэрэгцээт Европын чухал мэдээнүүд 17.00 эсхүл 18.00 цагийн үед гардаг. 18.00 -с хойш үеэс английн фунт ажиллагаанд орж ирнэ. Британы мэдээнүүд 18.00 эсхүл 19.00 нийтлэгдснээр английн фунттэй холбоотой хосуудад шууд нөлөөлж эхэлнэ. Эдгээр мэдээнүүд GBP/USD хосод эхний ээлжинд нөлөө үзүүлнэ. Европ болон Английн мэдээнүүдийг сайн харьцуулж чадвал ханшийн хөдөлгөөний чиглэлийг сайн мэдрэн боломжийн ашгийг хийх боломжтой.

Форекс арилжааны Америкийн үе.

21.00 - 4.00 цагууд бол Форекс трейдерүүдийн хувьд хамгийн халуухан мөч болдог. Форексын энэ үе нь зах зээлийг идэвхитэй хөдөлгөдөг мөнгө ихтэй америкийн тоглогчид орж ирдэгээрээ онцлогтой. Яг энэ үед валютын хосуудад шууд нөлөө үзүүлдэг америкийн үнэт цаасны биржүүд, хөрөнгө оруулалтын том сангууд, банкууд, асар хэмжээний мөнгөтэй трейдерүүд, түүний дотор мэдээжээр хувь хүмүүс ихээр ажилладаг. Өглөөнөөс эхэлсэн хөдөлгөөн эргэн буцах, шинээр хөдөлгөөн үүсэх зэрэг нь Форексын яг энэ үед бүрэн хэмжээнд байж болдог. Иймээс энэ үед худалдаанд хамаагүй эрсдэл гаргахгүй болгоомжтой оролцох хэрэгтэй. Форекс арилжааны Америкийн үеийн идэвхи, чиглэл ид хүчтэй байдаг 21.00 - 23.00 хооронд онцгой анхаарал хандуулах хэрэгтэй. АНУ-ын чухал мэдээнүүд Улаанбаатарын цагаар 21.30 гардаг. 02.00 гэхэд арилжааны идэвхи сулран Америкийн худалдаачид өөрийн позицуудыг хаан амрахдаа бэлтгэж эхэлдэг. Гэхдээ 3.15 цагт гардаг Америкийн нөөцийн холбооны хурлын шийдвэр нь Америкийн эдийн засагтай шууд холбоотой байдаг учраас валютын зах зээлд маш хүчтэй нөлөө үзүүлдэг.        

Янз бүрийн цагийн бүсүүдэд Форексын үеүүдийн цагийг тодорхойлоход http://www.forexmarkethours.com/ сайтыг ашиглахад их тохиромжтой байдаг. Зургийг хар. Улаанбаатар 8-р цагийн бүсэд орших тул задаргаат жагсаалтаас GMT+8 олоод Go товчийг дарахад Улаанбаатарын цагаар Лондон, Нью-Йорк, Сиднее, Токиогийн үеүүдийг өөр өнгөөр хүснэгтлэн үзүүлдэг. Эндээс та өөрийн амьдарч байгаа газрын цагаар аль хэсгийн үе явагдаж байгааг амархан тодорхойлох болно.

Дүгнэвэл хэдийгээр Форекс 24 цагийн турш ажилладаг ч арилжааны идэвхитэй үеүүдийн сонголттой байдаг болохоор хөдөлгөөн бүрийг барих гэж хичээхийн оронд зарчим баримтлан оролцож өөрийн хувиа хүртэхийг хичээгээрэй. 1-2 валютын хосыг сонгон аваад үеүүдийн онцлог, цаг хугацааг тооцон туршаад үзээрэй. Ингэснээр та өөрийн цаг зав, нервийг бага зарцуулан ашиг олох болно.

Танд амжилт хүсье