Та манай сайтын Форекс хэсгийн материалуудтай танилцан Форекс захын талаар анхны мэдэгдхүүн олж авсан бол одоо санхүүгийн эрх чөлөөтэй болох гараагаа эхлүүлэх болжээ. Юуны түрүүнд арилжаанд зуучлах дилингийн /брокер/ компанийг сонгох хэрэгтэй. Манайд арилжаанд зуучилна гэсэн компаниуд, банкууд байдаг. Та эдгээрийг юуны өмнө судлаад үзээрэй. Арилжааны эрхийн сертификат, үйл ажиллагааны цар хүрээ, тавигдах шаардлага, хөрөнгийн хэмжээ, баталгаа, үйлчлүүлэгчдийн санал бодол, төлбөрийн систем гээд бүхий л зүйлийг судлах хэрэгтэй. Товчоор бол тухайн брокерын найдвартай эсэхийг шалгах. Энд интернет нилээд ухах хэрэг гарах байх. Өмнөх хичээлүүдтэй танилцсан бол бодитоор арилжаанд оролцоход нилээд их хэмжээний мөнгө хэрэгтэй, хувь хүмүүс хэрхэн арилжаанд ордог, эрсдлээ хэрхэн тооцдог гэх мэтийг ойлгосон байх. Брокерын компаниа сонгох нь таны асуудал болох ч энд хэдэн зүйлийг сануулъя.

1. Үйлчилгээний чанар. Энд захиалгын биелэлт, холболтын доголдол, мөнгө шилжүүлэх болон хүлээн авах хугацаа зэргийг ойлгох хэрэгтэй. Үйлчилгээ муутай брокеруудын талаар мэдээж их олон гомдол гарсан байдаг. Харин найдвартай компаниуд бол ийм нөхцөл байдал гарсан хэдий ч маш шуурхай шийдвэрлэж байдаг.  
2. Арилжааны нөхцөл. Брокероо сонгох хоёрдахь үндсэн шалгуур. Энд спрэд, своп, шимтгэл зэргийг харах. Өнгөцхөн харвал арилжааны нөхцөл бүгдэд нь ижилхэн мэт боловч энэ нь яг тийм биш шүү. Зарим компаниудын хувьд эдгээр нь бүр 2 дахин зөрүүтэй байх нь ч бий. Үнэндээ бол форексын зуучлагчид спред, шимтгэлээр л мөнгө хийдэг. Иймээс брокертой хийж байгаа гэрээний нөхцөлтэй сайтар танилцах хэрэгтэй.
3. Дэмжлэг. Энэ хүчин зүйл нэг их чухал биш. Учир нь бүхий л брокерын компаниудад бараг ижилхэн байдлаар дэмжлэг үзүүлдэг. Утсаар болон онлайн чат хэлбэрээр дурын үедээ холбогдох боломжтой байдаг. Энд нэг зүйлийг тодруулахад гадаадын компаниудаас Монголоос үнэгүй холбогдох дугаар бараг олдохгүй болов уу. Гэхдээ манай брокеруудад ийм дугаар байдаг эсэхийг мэдэхгүй юм. Дэмжлэг бол эхний үед л хэрэгтэй болно.
4. Программ хангамж. Арилжааны терминалууд бараг ижилхэн шахуу. Хэрвээ олон сонголттой байвал илүү дээр. Жишээ нь гар утасны программ хангамжтай байвал их эвтэйхэн. Үндсэн судалгааны ажлаа компьютер дээрээ хийгээд явцыг гар утаснаасаа хянаад байх гэх мэтээр.
5. Аюулгүй байдал. Зарим брокерууд ямар нэгэн баталгаа шаардахгүйгээр хэнд ч хамаагүй данс нээгээд байдаг. Ихэнх брокерууд үйлчлүүлэгчийн паспортын хуулбарыг илгээхийг шаарддаг. Данснаасаа мөнгө авахдаа тусгай код эсхүл утсаар кодоо аван гүйлгээгээ баталгаажуулдаг.

Интернетэд зарим төрлийн ташаа мэдээллүүд их байдгийг анхаарах хэрэгтэй. Шууд бодит данс нээж арилжааг эхлүүлэх хэрэггүй. Демо данс нээх нь брокероо судлах арилжааны туршлагатай болох гээд олон сайн талуудтай. Демо данс гээд хамаагүй замбраагүй байвал бас л юу ч сурахгүй.
Туршилтын данс нээгээд арилжаанд нэг ороод нилээд ашиг хийгээд би сурчихлаа, амархан юм байна гээд жинхэнэ мөнгөөр тоглоод бүгдийг алдах ч явдал байдаг. Туршилтын данс бол жинхэнэ мөнгө байхгүй болохоос арилжааны мэдээлэл, ханшийн хөдөлгөөн, ашиг, алдагдал гээд зүйлүүд яг бодит данстай ижилхэн.
Арилжаанд оролцох брокероо сонгоход харгалзан үзэх зүйлийн талаарх миний бодол нэг иймэрхүү байна.