Сүүлийн жилүүдэд сайт боловсруулах ажиллагаанд раектив буюу дэвшилтэд Angular, React гэх мэтийн javascript сангууд маш хүчтэй түрэн орж ирэх болсон. Үүний нэг бол Vue фреймворк бөгөөд сайтад энэхүү дэвшилтэд технологи ямар боломжтой, бусдаас ямар давуу талуудтай, ямар зориулалттай болохыг цуврал хичээлүүдээр толилуулна. Эхлээд Javscript фреймворкууд яагаад ийм хүчтэй түрэн орж байгаа талаар ярилцая.
Сайт бүтээх уламжлалт технологид веб хөтөч серверт тодорхой хүсэлт (requiest) явуулаад түүнээс ирүүлсэн мэдээллийг хэрэглэгчид үзүүлэх үүргийг голлон гүйцэтгэн харин өгөгдлийн сангаас мэдээлэл татан, хуудсыг бүрдүүлэх, буцаан дамжуулах бүхий л ажлыг сервер хариуцан хийдэг. Та ямар нэгэн сайт бүтээж байсан бол яг ийм үүргийг Php хэл сервер талд гүйцэтгэдэг гэдгийг мэдэх байх. Сайтын ямар нэгэн мэдээллийг өөрчлөх хэрэгтэй болбол хөтөч серверт дахин хүсэлтийг илгээн сервер хуудсыг бүрдүүлэн хөтөчид буцааснаар сайтын агуулга өөрчлөгдөнө. Эдгээр ажиллагааг хийхэд сервер тодорхой хугацаа зарцуулах нь ойлгомжтой тул ажиллагааг хурдан болгох зорилгоор мэрэгжилтнүүд сайтад хэрэглэгч талд үзүүлж буй хуудаст javascript -ийг оруулснаар зарим нэгэн зүйлийг динамикаар буюу серверт хандахгүйгээр хийх боломжийг нэвтрүүлсэн. Үүний үр дүнд олон төрлийн ажиллагааг хөтөч дээр шууд хийн хуудсыг удирдах боломжтой Jquire гэх мэтийн сангууд бий болсон. Эдгээр сангуудад тодорхой ажиллагаануудыг хийх нэгдсэн стандарт байхгүй байсан нь асуудал болж байлаа. Жишээлбэл сайтад нэвтрэх формд логин, нууц үгээ оруулаад серверт илгээхэд тухайн асуудлын шийдлийг сан болгон өөрийнхөөрөө шийдэх жишээтэй. Ажиллагаануудыг тодорхой стандарттай болгох үүднээс javascript фреймворкууд гарч ирсэн. Олонд танигдсан фреймворкууд гэвэл Angular, React -ийг нэрлэж болно. Vue бол Angular, React -ийн сайн талуудыг өөртөө шингээсэн сурахад энгийн, маш жижигхэн фреймворк. Фреймворкийн албан ёсны сайтаас харвал
Vue фреймворк шахагдсан байдлаараа ердөө 20KB хэмжээтэй нь харагдана. Vue -г дараах байдлаар ашиглах боломжтой.
- Өмнө нь хийгдсэн сайтын нэмэлт хэрэгслээр. Өөрөөр хэлбэл та Php дээр зохиосон сайтдаа тодорхой динамик ажиллагааг оруулъя гэвэл фреймворкийг хуудастаа оруулаад түүний боломжийг чөлөөтэй ашиглаж болно.
- Vue фреймворкийг ашиглан бүрэн хэмжээний SPA (single page application) програмыг зохиож болно.
Одоогоор Vue -ийн Github хуудасны хэрэглэгчдийн үнэлгээ Star -ийн тоог Angular, React -ийнхтай харьцуулбал тэднээс давсан үзүүлэлттэй болоод байгаа. Та үүнийг өөрөө шалгаад үзээрэй. Vue -гийн зохиогч Evan You нь Angular2 -ын боловсруулалт дээр ажиллаж байсан мэрэгжилтэн бөгөөд өмнө нь гарсан javascript фреймворкуудын сайн талуудыг илүү хөнгөн, ашиглахад энгийн болгон шинэ фреймворкдоо оруулсан нь гарцаагүй. Дараагий хичээлүүдээр Vue -гийн боломжуудыг судлах болно.