HyperText Markup Language (HTML) гэдэг нь веб хуудас хийхэд зориулагдсан албан ёсны /стандарт/ хэл юм. Веб хуудсыг төрөл бүрийн WEB BROWSER (интернет хөтөч) ээр үзэж болно. Интернет хөтөч нь HTML ээр хийгдсэн хуудасны элементүүдийг хэв шинжийг тодорхойлолтуудыг хөрвүүлж хэрэглэгчид үзүүлдэг программ хангамж юм. Фонт, шугам, төрөл бүрийн графикийн элементүүдийг ашиглан веб хуудсыг хэлбэржүүлэх ажиллагааг хийх боломжийг HTML бүрдүүлж өгдөг.

Ихэнх хуудсууд нь гарчиг, догол мөр, жагсаалт гэх мэтийн стандарт элементүүдтэй байдаг. Хуудасны мэдээллийн бүтэц, бүрэн байдлыг ханган HTML-ийн тег-ийг ашиглан тухайн элементийг хэрхэн харуулах мэдээллийг интернет хөтөчид дамжуулан өгч болно. Интернет хөтөч нь хуудсыг уншихдаа HTML-ийн тегийг хөрвүүлэн зохиогч ямар байдлаар хэлбэржүүлсэн тэр хэлбэрээр нь дэлгэцэнд үзүүлнэ.

Ихэнх тохиолдолд зохиогч өөрийн хуудасны гадаад хэлбэрийг хатуу тодорхойлж өгсөн байдаг. Интернет хөтөчийн боломжоос хамаарч хэрэглэгч хуудасны үзэгдэх хэлбэрийг удирдаж болох боловч түүний агуулгыг өөрчлөх боломжгүй. Жишээ нь нэг интернет хөтөч догол мөрийг тэмдэглэсэн тегийг таниад хуудсыг зөв гаргаж байхад нөгөө нь танихгүй байх тохиолдол байна. Зарим интернет хөтөч хуудасны үсгийн хэмжээ, өнгө зэргийг тохируулж болох боломжтой байдаг.

HTML-тегүүдийг ерөнхийд нь хоёр төрөлд хувааж болно:

1. Хуудасны бие хэсэг body буюу интернет хөтөчөөр хэрхэн харагдахыг тодорхойлсон тегүүд
2. Гарчиг, зохиогч г.м хуудсаны шинж чанаруудыг тодорхойлсон тегүүд

HTML -ийн хамгийн давуу тал нь та хуудсаа төрөл бүрийн үйлдлийн системд / платформ / төрөл бүрийн интернет хөтөчид тохирохоор хийж болдогт оршино.

HTML хуудсыг хийх программ хангамж

HTML хуудсыг хийхэд танд ямар программ хангамжууд хэрэгтэй болох вэ гэвэл

• Дурын текст засварлагч эсвэл HTML үүсгэх тусгай зориулалтын программ. HTML хуудас үүсгэх программын сонголт нь зөвхөн зохигчийн өөрийн хүслээс хамаарна. Жишээ нь, Netscape компаний "Netscape Navigator Gold" төрлийн HTML- засварлагч нь WYSIWYG (What You See Is What You Get) технологийг ашиглан хуудсыг гарафикаар үүсгэх боломжтой байдаг бол хуудсыг үүсгэхэд ихэнхдээ хэрэглэгддэг хэрэгслүүд нь хуудсыг HTML формат руу хөрвүүлэх боломж бүхий хөрвүүлэгчтэй байдаг. Ер нь энгийн Notepad текст засварлагч байхад хангалттай.
• Зохиосон веб хуудсаа харах интернет хөтөч программ. Энд өргөн дэлгэрсэн Internet explorer, Firefox, Chrome аль нь ч болно.

Үндсэн дүрэм

HTML-ийн бүх тегүүд "<" (зүүн өнцөгт хаалт)-ын тэмдгээр эхлээд ">" (баруун өнцөгт хаалт)-ын тэмдгээр дуусна. Нээлтийн ба хаалтын тег гэж байна. Доорх жишээ нь гарчигийн тегийг үзүүлж байгаа бөгөөд гарчигийн текст нь нээлтийн ба хаалтын тегүүдийн дунд бичигдэнэ:

<TITLE> Хуудасны гарчиг </TITLE>

Хаалтын тег нь нээлтийн тегээс өнцөг хаалтын доторх тегийн нэрийн өмнөх налуу зураасаар л ялгаатай. Дээрх жишээн дээр <TITLE> тег нь хөтөчид гарчигийн формат тег ашиглаж байгааг харин </TITLE> нь гарчиг дуусч байгааг тус тус мэдэгдэж байна.

<P> (догол мөр тодорхойлох тег) г.м зарим тегүүдэд хаалтын тег байх шаардлагагүй боловч хаалтын тегийг ашиглах нь хуудасны эхийг ойлгомжтой болгож өгөхөөс гадна XML төрлийн хуудаснууд хаалтын тегийг заавал шаарддаг тул та бүхэн эхнээсээ хаалтын тегийг хэрэглэж сурах нь цаашдаа хэрэгтэй гэдгийг санаарай.

HTML нь тегийг бичиж байгаа тэмдэгтийн том жижиг үсгээр бичигдсэн эсэхийг ялгадаггүй учраас дээрх жишээг дараах байдлаар бичиж болно:

<title> Хуудасны гарчиг </title>

Санамж. Хуудсыг хөтөч хөрвүүлэх үедээ HTML хуудасны эхэд оруулсан tab, space товчнуудаар оруулсан нэмэлт хоосон зай, мөр шилжүүлэг зэрэг эх текстийг уншихад хялбарчилсан тэмдэгтүүдийг хасдаг. Дээрх тэмдэгтүүдийг HTML хуудсанд зөвхөн <PRE> ба </PRE> тегүүдийн хооронд оруулж өгнө.