Өмнөх постуудаас та брокерын компаний хэрхэн сонгох, хэрхэн данс нээлгэх, арилжааны терминалаа хэрхэн суулгах талаар мэдээлэл авсан гэдэгт найдаж байна. Арилжааны терминалаа суулгасан бол одоо худалдаанд хэрхэн оролцох талаар авч үзье.
Дахин сануулахад яаран бодит мөнгөөр оролцож болохгүй шүү.
Ер нь өмнөх нийтлэлүүдийг уншин Форексийн захын анхны мэдлэгийг олж авах хэрэгтэйг зөвлөе.
Форексийн зах дээр ажиллан ашиг олох үндэс бол "хямдхан аваад үнэтэй зарах" гэсэн энгийн дүрэмтэй. Иймээс санхүүгийн зах зээл дээрх бүх ажил бол санхүүгийн хэрэгслүүдээр дараалсан худалдах, худалдан авах ажиллагааг л хийх юм. Үүний тулд арилжааны хэлцлүүдийг нээх, өөрчлөх, хаах хэрэгтэй.
Арилжааны позиц гэдэг нь ямар нэгэн үйлдэлд ороогүй худалдах ба худалдан авах гэрээ, захад хүлээсэн үүргийн тоо болно.
Программыг ашиглан хийгдэх арилжааны бүхий л үйл ажиллагаа арилжааны позицтой холбоотой. Арилжааны позиц нээнэ гэдэг нь худалдаанд оролцох харин түүнийг хаана гэдэг нь худалдаанд орох үедээ хийсэн үйлдлийн эсрэг үйлдлийг хийхийг хэлнэ. Өөрөөр хэлбэл та ямар нэгэн валютын хосоор худалдан авах позици нээсэн бол хаахдаа тухайн хосоор худалдах үйлдлийг хийнэ гэсэн үг. Арилжааны позицийг зах зээлийн үнээр эсвэл хүлээгдэх /хойшлогдсон/ захиалгаар зуучлагч компани нээдэг. Нээгдсэн позицид Stop Loss, Take Profit -ийн утгыг өөрчилж болдог. Позиц нь худалдаачны шаардлагаар эсхүл Stop Loss, Take Profit -ийн түвшин хүрэхэд автоматаар хаагдана. Зөвлөгч ашиглан арилжаанд оролцох үед позицийг зөвлөгч нээн, өөрчлөн, хаах боломжтой.
Захиалгын төрлүүд
Арилжааны терминал /программ/ худалдааны үйлдлийг гүйцэтгэх захиалгыг брокерт бэлтгэн өгөх боломжийг олгодог. Үүнээс гадна терминал нээлттэй байгаа позицуудыг хянах, удирдах бололцоог олгоно. Үүний тулд хэдэн төрлийн арилжааны захиалгыг ашигладаг.
Захиалга гэдэг бол хэрэглэгчийн зүгээс брокерын компанаар ямар нэгэн худалдааны үйлдлийг хийлгүүлэхээр өгсөн үүрэг эсвэл захирамж юм.
Metatrader программд /ер нь ямарч арилжааны терминалд/ дараах захиалгуудыг ашигладаг.
- Зах зээлийн захиалга. Энэ бол хэрэглэгч брокерын компанид санхүүгийн аль нэгэн хэрэгслээр тухайн үеийн ханшаар худалдан авах эсхүл худалдахаар өгсөн үүрэг. Ийм төрлийн захиалгыг биелүүлсэн тохиолдолд шууд арилжааны позиц нээгдэнэ. Худалдан авалтыг Ask /эрэлтийн үнэ/ үнээр харин худалдахад /зарах/ Bid /нийлүүлэлтийн үнэ/ үнээр хийдэг. Зах зээлийн захиалгад Stop Loss, Take Profit -ийн түвшинг заан өгч болно.
- Хүлээгдэх буюу хойшлогдсон захиалга. Энэ бол хэрэглэгч брокерын компанид санхүүгийн аль нэгэн хэрэгслээр ирээдүйд хүрэх үнээр худалдан авах эсхүл худалдахаар өгсөн үүрэг. Программд ийм төрлийн дөрвөн янзын захиалга байдаг. Захиалгад Stop Loss, Take Profit -ийн түвшинг заан өгч болно. Хойшлогдсон захиалга биелэгдэхэд түүнд тавигдсан Stop Loss, Take Profit -ийн түвшингүүд нээгдсэн позицид автоматаар үйлчилж эхэлдэг
- Buy Limit - "Ask" үнэ ирээдүйд өгөгдсөн утгатай ижилхэн болоход худалдан авалт хийх. Энд тухайн үеийн ханш тогтоосон үнээс дээгүүр /үнэтэй/ байдаг. Валютын ханш тодорхой түвшин хүртэл буураад эргээд өснө гэсэн тооцоонд тулгуурлан ийм төрлийн захиалгыг голдуу хийдэг.
- Buy Stop - "Ask" үнэ ирээдүйд өгөгдсөн утгатай ижилхэн болоход худалдан авалт хийх. Энд тухайн үеийн ханш тогтоосон үнээс доогуур /хямд/ байдаг. Валютын ханш ямар нэгэн түвшинг туулаад өөрийн өсөлтөө үргэлжлүүлнэ гэсэн тооцоонд тулгуурлан ийм төрлийн захиалгыг голдуу хийдэг.
- Sell Limit - "Bid" үнэ ирээдүйд өгөгдсөн утгатай ижилхэн болоход худалдах /зарах/. Энд тухайн үеийн ханш тогтоосон үнээс доогуур /хямд/ байдаг. Валютын ханш тодорхой түвшин хүртэл өсөөд эргээд буурна гэсэн тооцоонд тулгуурлан ийм төрлийн захиалгыг голдуу хийдэг.
- Sell Stop - "Bid" үнэ ирээдүйд өгөгдсөн утгатай ижилхэн болоход худалдах /зарах/. Энд тухайн үеийн ханш тогтоосон үнээс дээгүүр /үнэтэй/ байдаг. Валютын ханш ямар нэгэн түвшинд хүрээд үргэлжлэн буурна гэсэн тооцоонд тулгуурлан ийм төрлийн захиалгыг голдуу хийдэг.
- Stop Loss - Санхүүгийн хэрэгслийн үнэ алдагдалтай тал руу явж эхэлсэн үед алдагдлыг багасгах зорилготой захиалга. Хэрэгслийн үнэ захиалгад өгсөн үнийн түвшинд хүрэхэд позицийг автоматаар хаадаг. Ийм захиалга нь нээлттэй позици эсхүл хойшлогдсон захиалгатай дандаа холбоотой байна. Захиалгыг брокерын компанид зөвхөн хойшлогдсон эсхүл зах зээлийн захиалгын хамтаар өгдөг. Энэхүү захиалгын нөхцлийг шалгахдаа урт позицийн /худалдан авах/ хувьд Bid үнийг харин богино позицийн /худалдах/ үед Ask үнийг ашигладаг. Stop Loss -ийн түвшинг автоматаар шилжүүлэхэд Trailing Stop -ийг ашиглаж болно.
- Take Profit - Санхүүгийн хэрэгслийн үнэ тооцож байсан түвшин хүрэхэд ашгаа авах зорилгоор энэ захиалгыг ашигладаг. Энэ захиалга биелэгдэхэд тухайн позиц хаагдана. Ийм захиалга нь нээлттэй позици эсхүл хойшлогдсон захиалгатай дандаа холбоотой байна. Захиалгыг брокерын компанид зөвхөн хойшлогдсон эсхүл зах зээлийн захиалгын хамтаар өгдөг. Шалгах нөхцөл нь Stop Loss -той адил.
Санамж:
- Арилжааны бүх үйлдлүүдийг биелүүлэх үнийг брокер тодорхойлдог.
- Stop Loss, Take Profit -ууд зөвхөн нээлттэй позицийн хувьд биелэгдэх ба хойшлогдсон захиалгад биелэгдэхгүй.
Metatrader программын захиалгын төрлүүдийг сайтар ойлгон аваарай. Бид дараагийн хичээлээр программыг ашиглан арилжааны позицийг хэрхэн удирдах талаар авч үзэх болно.