Элсэлтийн ерөнхий шалгалтын бүртгэл эхлэхтэй зэрэгцээд сурагчид, эцэг эхчүүд дамжаа, сургалтын төв, давтлага өгөх багшийн эрэлд гардаг бололтой. Энэ нь зүгээр сууж байснаас арай дээр гэж үзэж болох ч нэгэнт оройтсон ажил юм даа. Элсэлтийн шалгалт 2-3 сарын дараа эхлэх гэж байхад давтлага, дамжаагаар бүтэн 6-7 жилийн програмыг сурчихдаг бол сайхан л юм. Уул нь шалгалтын бүртгэл эхлэхтэй зэрэгцээд чухал сэдвүүдийг давтан харах, шалгалт өгөх арга техникт түлхүү анхаарах буюу олж авсан мэдлэгээ цэгцлэх ажиллагааг эхэлмээр байгаа юм. Гэтэл манайхан хоцрогдол арилгах, давтлага авах, заалгах, яаж хурдан сурах гэх мэтийн сонин зүйлээр хөөцөлдөн эцэстээ шалгалтын материалын түлхүүрийн эрэлд гарснаар дуусдаг нь ердийн үзэгдэл болжээ.
Элсэлтийн шалгалт бол таныг дараагийн шатны сургуульд элсэх боломжтой эсэхийг тодорхойлох ердийн нэг сорилго. Шалгуулж буй хүн шалгалтад үзүүлэх дүндээ өөрөө босго тавиад шалгалтад авъя гэсэн оноогоо авч чадаагүй бол цааш сурах эсэх дээрээ ч бодох хэрэгтэй. Манай сургуулиуд босго оноогоо буулган шалгалтад бараг тэнцээгүй шахуу хүүхдүүдийг олноор элсүүлэн хохироох болсон нь үнэн. Элсэлтийн ерөнхий шалгалт авч эхэлснээс хойш жил бүр шалгалтын материал хөнгөрөн, сургуулиудын босго оноо тогтмол буурсаар ирсэн байдаг. Энэ ч боловсролын системийн доройтол байх.
Оршил хэсгийг дуусгаад ерөнхий асуудалдаа шилжие. Дамжаа, давтлагуудыг хүүхдүүдэд тусгай програмаар хичээл орон, даалгавар өгөн, шалгалт сорилго авах байдлаар явдаг байх гэж боддог байлаа. Гэтэл нэг хүн манай сайтад мөнгө шилжүүлсэн тусгай эрхийг хурдан нээгээд өгөхийг гуйх, шаардахын дундуур юм болов. Би ажилтай байсан тул тодорхой хугацааны дараа идэвхижинэ гэтэл тухайн хүн хүүхдүүдэд хичээл орох гээд яараад байгаагаа учирладаг юм байна. Тэгээд би тусгай эрхийг нь нээж өгч байлаа. Сайтын материалуудыг хичээл заахад ашиглаж болохгүй зүйлгүй ч тэр багш өөрөө хичээлдээ бэлтгэхгүйгээр хүүхдүүдэд яаж хичээл заах гэж байгаа нь сонин. Бас нэг удаа математикийн хичээлээр давтлага өгч буй газраар орлоо. Гэтэл багш нь самбарт бодлого бодоод түүнийг нь хүүхдүүд бичин авч байхтай тааралдав. Үүнийг давтлага гэх үү эсхүл хуулан бичлэг гэх үү?
Математик бол хуулан, цээжилдэг зүйл биш хүний сэтгэлгээний дээд оргил. Ихэнх хүмүүс их бодлого бодсноор математикт сайжрана гэж үзээд байдаг. Бодлого бодох нь үйлдлийг зөв хийх техникт л сургадаг болохоос математикт сургахгүй. Математикийн онол, ухагдхууны тодорхойлолт, дүрэм, теорем, асуудлыг шийдэх аргачлалууд гэх мэт суурийг судлахгүйгээр ямарч үр дүнд хүрэхгүй.
Та хэн нэгний тоо бодохыг харан хуулахыг бэлтгэл гэж андуурав. Энэ бол цагийн гарц. Өөрөө шийдсэн нэг бодлого бусдын бодон үзүүлж буй арван бодлогоос ч илүүг танд өгнө. Үүнд итгээрэй. Өөрөө шийдэхийн тулд тухайн сэдвийн талаар судлах хэрэгтэй болдог. Сэдэвтэй холбоотой хичээлүүдийг үзээд тухайн сэдвийн холбоотой бодлогыг бодон бэлтгэл хийхэд цаг хэрэгтэй гэдгээс л бэлтгэлийг 1-1,5 жилийн туршид хийхийг зөвлөөд байгаа юм. Ингэж бэлтгэвэл та математикийн хичээлийг сууриар нь зөв ойлгон ямар уялдаа холбоотой, амархан, гоё хичээл болохыг мэдрэн дуртай болоод зогсохгүй бусад хичээлүүдийг ч тун төвөггүй ойлгох болсноо мэдрэнэ.
Танхимын хичээлээс онлайн сургалтын бас нэгэн давуу тал нь хичээлийг хэзээ ч, хаанаас ч, хэдэн удаа ч үзэх боломжтойд оршино. Эхэн үедээ бие даан суралцах арга барилтай болтлоо сэдвийг ойлгох гэж нилээд хугацаа зарж мэднэ. Үүнээс шантарч огт болохгүй. Хүн насан туршдаа боловсорч байдаг тул бие даан суралцахад багаасаа дадах хэрэгтэй.
Сайтын үнэтэй материалуудыг үзэхэд та багахан хэмжээний мөнгө төлнө. Таны төлсөн мөнгө сайтын хөгжилд оруулж буй хандив харин сайтын материалуудыг судлан ойлгоход зориулсан цаг хугацаа, мэдэн авсан зүйлүүд бол та өөртөө оруулж буй хөрөнгө оруулалт юм шүү. Манайхан төлсөн мөнгөө хөрөнгө оруулалт гэх гээд байдаг нь буруу. Мөнгө төлчихөөд цаг зарцуулахгүй, биеэ дайчлахгүй бол мөнгөө гээсэнтэй адил. Бид хүмүүст амархан сургана, хамгийн чанартай мэдлэг олгоно, ЭЕШ -д 800 оноо гэх мэтээр амлалт өгөхгүй. Энэ ч боломжгүй. Хүрэх зорилгодоо та хүрэх гэж зүтгэхээс өөр хэн нэгэн таны өмнөөс хэзээ ч явахгүй. Бидний зорилго бол аль болохоор хэрэгцээтэй хичээл, сайн материалуудыг нийтлэх л юм. Бусад зүйл зөвхөн таниас хамаарна.
Ирээдүйд бие даан суралцах, онлайн ажил, сургалт илүү давамгайлах нь нэгэнт тодорхой болсон тул үүнд эртнээс л суралцаж эхэлбэл таны давуу тал болно гэдгийг сануулахын ялдамд танд амжилт хүсье.